സ്ത്രീകള്‍ക്കെതിരായ മോശം പരാമര്‍ശത്തില്‍ അമ്മ പ്രസിഡന്‍റും എംപിയുമായ ഇന്നസെന്‍റിനെതിരെ കേസെടുക്കുമെന്ന് വനിതാ കമ്മീഷന്‍. ഇന്നസെന്‍റിന്‍റെ പ്രസ്താവന ശ്രദ്ധയില്‍പ്പെട്ടു. ഇന്നസെന്‍റിനെതിരെ കമ്മീഷന്‍ സ്വമേധയാ കേസെടുത്ത് അന്വേഷണം നടത്തുമെന്ന് വനിതാ കമ്മീഷന്‍ അധ്യക്ഷ എം.സി.ജോസഫൈന്‍ അറിയിച്ചു.
സ്ത്രീയോടു മോശമായി പെരുമാറുന്ന രീതികളൊന്നും നിലവില്‍ മലയാളസിനിമയിലില്ലെന്നും സ്വയം മോശക്കാരായവരാണു കിടക്ക പങ്കിടുന്നതെന്നുമായിരുന്നുഇന്നസെന്‍റിന്‍റെ വിവാദ പ്രസ്താവന. റോളുകള്‍ക്കുവേണ്ടി നടിമാര്‍ കിടക്ക പങ്കിടണമെന്ന ഒരു നടിയുടെ ആരോപണത്തെക്കുറിച്ച്‌ തനിക്ക് അറിയില്ല.അക്കാലമെല്ലാം സിനിമയില്‍ കഴിഞ്ഞുവെന്നും നടി അത്തരക്കാരിയാണെങ്കില്‍ അങ്ങനെയുള്ള കാര്യങ്ങള്‍ നടക്കുമായിരിക്കുമെന്നുമാണ് ഇരിങ്ങാലക്കുടയിലെ വസതിയില്‍ നടത്തിയ പത്രസമ്മേളനത്തില്‍ അമ്മ പ്രസിഡന്‍റ് പറഞ്ഞത്.
ഇന്നസെന്‍റിന്‍റെ പ്രസ്താവനയെ തള്ളി സിനിമാമേഖലയില്‍ പ്രവര്‍ത്തിക്കുന്ന വനിതകളുടെ കൂട്ടായ്മയായ വിമെന്‍ ഇന്‍ സിനിമ കളക്ടീവ് രംഗത്തെത്തിയിരുന്നു. സമൂഹത്തിലുള്ളതു പോലെയുള്ള പ്രശ്നങ്ങള്‍ സിനിമയിലുമുണ്ട്. അവസരങ്ങള്‍ ചോദിച്ചെത്തുന്ന പല പുതുമുഖങ്ങളും ചൂഷണത്തിനു വിധേയരാവുന്നുണ്ടെന്നും സംഘടന ഫേസ്ബുക്ക് കുറിപ്പില്‍ പറഞ്ഞിരുന്നു.
