കേന്ദ്രഭരണം മറയാക്കി കോഴ : മുഖം നഷ്ടമായ ബിജെപി പ്രതിരോധത്തില്‍

തലസ്ഥാനത്തെ ഒരു മെഡിക്കൽ കോളജിന് ഇന്ത്യൻ മെഡിക്കൽ കൗൺസിലിന്റെ അംഗീകാരം നേടാനായി വേണ്ട ഒത്താശ ചെയ്യാമെന്നേറ്റു കോടികൾ വാങ്ങിയെന്ന ആക്ഷേപമാണ് ഉയർന്നിരിക്കുന്നത്. പാർട്ടിയുടെ ഒരു സെൽകൺവീനറുടെ നേതൃത്വത്തിലുളളവരാണ് ഇതു ചെയ്തത്. ഇവരിലൊരാൾക്ക് ഒരു പ്രധാന സംസ്ഥാന ഭാരവാഹിയുമായി അടുത്തബന്ധം ഉണ്ടെന്നു കണ്ടതോടെ എതിർചേരികൾ പടയൊരുക്കം തുടങ്ങുകയായിരുന്നു.

പണം കൊടുത്തെങ്കിലും കാര്യം നടന്നില്ലെന്നു വന്നതോടെ സംരംഭകൻ പാർട്ടി നേതൃത്വത്തിനു പരാതി നൽകി. എൻഡിഎ സഖ്യകക്ഷിയായ ബിഡിജെഎസുമായി സഹകരിക്കുന്ന ഇയാൾ അവരെ ഇക്കാര്യം ധരിപ്പിച്ചതിനെത്തുടർന്ന് ആ നേതൃത്വവും ഇടപെട്ടു. സംസ്ഥാന നേതൃ യോഗത്തിൽ ഇതു ചൂടുപിടിച്ച ചർച്ചയ്ക്കു വഴിയൊരുക്കിയതോടെ നേതാക്കളായ കെ.പി.ശ്രീശൻ, എ.കെ.നസീർ എന്നിവരെ അന്വേഷണ കമ്മിഷനായി നിയോഗിച്ചു. ഇവർ നൽകിയ റിപ്പോർട്ടാണു പാ‍ർട്ടിയാകെ ഉറ്റുനോക്കുന്നത്.

കേന്ദ്രഭരണം മറയാക്കി പാർട്ടിയിലെ ചിലർ അഴിമതിക്കു ശ്രമിക്കുന്നുവെന്ന ആക്ഷേപം പാർട്ടിയിലാകെയുണ്ട്. തലസ്ഥാനത്തു തന്നെ മറ്റൊരു മെഡിക്കൽ സ്ഥാപനത്തിൽ നിന്നു പണം തട്ടിയതായ ആരോപണമുണ്ട്. പാലക്കട് പുതിയ മെഡിക്കൽ കോളജ് അനുവദിക്കാമെന്നു പറഞ്ഞു പണം വാങ്ങിയെന്ന ആരോപണവും സംഘടനയിലുണ്ട്.  പാർട്ടി സ്വാധീനം ശക്തമാക്കാൻ ശ്രമിക്കുന്ന തലസ്ഥാന ജില്ലയുമായി കേന്ദ്രീകരിച്ചാണ് ആക്ഷേപങ്ങളെന്നതും ഗൗരവത്തോടെയാണു നേതൃത്വം കാണുന്നത്. ജില്ലയിൽ മികച്ച പ്രതിഛായയ്ക്കും പ്രവർത്തനത്തിനും ശ്രമിക്കുമ്പോഴാണു ചിലർ പാർട്ടിയുടെ പ്രതിഛായ മോശമാക്കുന്നതെന്നാണ് ആക്ഷേപം. കർശനനടപടി വേണമെന്ന ആവശ്യം ശക്തമാണ്.