കരിപ്പൂരിലിറങ്ങേണ്ട യാത്രക്കാരെ നെടുമ്പാശ്ശേരിയിലിറക്കി; ഒമാന്‍ എയര്‍വേയ്‌സിനെതിരെ പ്രതിഷേധം

0
57

നെടുമ്പാശേരി: പൈലറ്റിന്റെ ജോലിസമയം കഴിഞ്ഞതിനാല്‍ യാത്ര തുടരാനാകില്ലെന്ന് ചൂണ്ടിക്കാട്ടി കരിപ്പൂരില്‍ ഇറങ്ങേണ്ട ഒമാന്‍ എയര്‍വേയ്സ് വിമാനം നെടുമ്പാശ്ശേരിയില്‍ ഇറക്കി. ബദല്‍ യാത്രാസൗകര്യം ഒരുക്കാതിരുന്നതില്‍ പ്രതിഷേധിച്ച് വിമാനത്തില്‍നിന്നിറങ്ങാതെ യാത്രക്കാര്‍ പ്രതിഷേധിച്ചു.

മോശം കാലാവസ്ഥയുടെ പേരിലാണ് രാവിലെ കരിപ്പൂരിലിറങ്ങേണ്ട വിമാനം നെടുമ്പാശ്ശേരിയിലേയ്ക്ക് തിരിച്ചുവിട്ടത്. 120 യാത്രക്കാരാണ് വിമാനത്തിലുള്ളത്. പൈലറ്റിന്റെ ജോലിസമയം കഴിഞ്ഞെന്ന് ചൂണ്ടിക്കാട്ടി കരിപ്പൂരിലേയ്ക്ക് എത്തിക്കാനാവില്ലെന്ന നിലപാടിലാണ് വിമാനക്കമ്പനി. എന്നാല്‍ ഇവര്‍ക്ക് കരിപ്പൂരിലേയ്ക്ക് തിരികെ പോകാനുള്ള മറ്റു യാത്രാ സൗകര്യം ഏര്‍പ്പെടുത്താനും അധികൃതര്‍ തയ്യാറായില്ല. ഇതിനെത്തുടര്‍ന്ന് യാത്രക്കാര്‍ വിമാനത്തില്‍നിന്ന് പുറത്തിറങ്ങാന്‍ തയ്യാറായില്ല.

നാലര മണിക്കൂറോളം വിമാനത്തില്‍ കാത്തിരുന്നിട്ടും യാത്രാസൗകര്യം ഒരുക്കാതിരുന്നതിനെ തുടര്‍ന്ന് യാത്രക്കാര്‍ ബഹളം വെച്ചു. തുടര്‍ന്ന് പോലീസ് ഇടപെടുകയും യാത്രക്കാരോട് വെളിയിലിറങ്ങണമെന്ന് ആവശ്യപ്പെടുകയുമായിരുന്നു. നാലുമണിക്കൂറോളം ഭക്ഷണം പോലും ലഭിച്ചില്ലെന്ന് യാത്രക്കാര്‍ പറയുന്നു. വിമാനത്തില്‍നിന്ന് പുറത്തിറങ്ങിയില്ലെങ്കില്‍ കേസെടുക്കുമെന്ന് യാത്രക്കാരെ ഭീഷണിപ്പെടുത്തിയതായും പരാതിയുണ്ട്.