ഹാര്‍ദിക് പട്ടേലിനെതിരെ ജാമ്യമില്ലാ വാറണ്ട്

0
32

അഹമ്മദാബാദ്: ഗുജറാത്തിലെ പട്ടീദാര്‍ സംവരണ പ്രക്ഷോഭ നേതാവ് ഹാര്‍ദിക് പട്ടേലിനെതിരെ ജാമ്യമില്ലാ വാറണ്ട്. ബി.ജെ.പി എം.എല്‍.എയുടെ ഓഫീസ് തകര്‍ത്ത കേസിലാണ് ഹാര്‍ദിക് പട്ടേലിനെതിരെ വാറണ്ട് പുറപ്പെടുവിച്ചത്. ഗുജറാത്ത് തിരഞ്ഞെടുപ്പില്‍ ഹാര്‍ദിക് കോണ്‍ഗ്രസുമായി ധാരണയിലെത്തുന്നുവെന്ന അഭ്യൂഹങ്ങള്‍ ഉയര്‍ന്നിരുന്നു. വിശാല്‍ നഗറിലെ കോടതിയാണ് വാറണ്ട് പുറപ്പെടുവിച്ചത്.

2015 ലെ പട്ടീദാര്‍ അനാമത് ആന്ദോളന്‍ സമിതി നടത്തിയ പ്രക്ഷോഭത്തിനിടെ ബി.ജെ.പി എം.എല്‍.എ ഋഷികേശ് പട്ടേലിന്റെ ഓഫീസ് തകര്‍ത്തുവെന്നാണ് കേസ്. ലാല്‍ജി പട്ടേല്‍ ഉള്‍പ്പെടെയുള്ള മറ്റ് പട്ടീദാര്‍ നേതാക്കള്‍ക്കെതിരേയും വാറണ്ടുണ്ട്. 2016 ല്‍ ഇതേ എം.എല്‍.എയുടെ കാറിനു നേരേയും കല്ലേറുണ്ടായി.

കഴിഞ്ഞ ദിവസം അഹമ്മദാബാദില്‍ രാഹുല്‍ ഗാന്ധി താമസിച്ച ഹോട്ടലില്‍ നിന്ന് ഹര്‍ദിക് പട്ടേല്‍ പുറത്തുവരുന്നതിന്റെ സിസിടിവി ദൃശ്യം പുറത്തുവന്നിരുന്നു. എന്നാല്‍ ഇരുവരും കൂടിക്കാഴ്ച നടത്തിയെന്ന ആരോപണം ഹര്‍ദിക് പട്ടേല്‍ തള്ളി.

2016ലാണ് പട്ടേല്‍ സമുദായക്കാര്‍ നടത്തിയ പ്രക്ഷോഭം ദേശീയ ശ്രദ്ധനേടുന്നത്. പ്രക്ഷോഭം അക്രമാസക്തമായതിനെത്തുടര്‍ന്ന് ഒമ്പത് പേര്‍ മരിക്കുകയും ചെയ്തിരുന്നു.