ഇന്ത്യന്‍ ക്രിക്കറ്റ് താരം ഉത്തേജകമരുന്ന് ഉപയോഗിച്ചതായി കണ്ടെത്തല്‍

0
45

മുംബൈ: ഇന്ത്യന്‍ ക്രിക്കറ്റിനെ ആശങ്കയിലാക്കി വീണ്ടും ഉത്തേജകമരുന്ന് വിവാദം. അന്താരാഷ്ട്ര ഉത്തേജക വിരുദ്ധ ഏജന്‍സിയുടെ (വാഡ) 2016ലെ റിപ്പോര്‍ട്ട് പുറത്തുവിട്ട റിപ്പോര്‍ട്ടിലാണ് ഇന്ത്യന്‍ താരം നിരോധിത മരുന്ന് ഉപയോഗിച്ചതായി തെളിഞ്ഞത്.

ബിസിസിഐ അംഗീകരിച്ചിട്ടുള്ള രാജ്യത്തെ 153 താരങ്ങളില്‍ നടത്തിയ പരിശോധനയിലാണ് ഇന്ത്യയില്‍ നിന്ന് ഒരാള്‍ കുടുങ്ങിയത്. എന്നാല്‍ ക്രിക്കറ്റ് താരത്തിന്റെ പേര് പുറത്തുവിട്ടിട്ടില്ല.

ഇതു രണ്ടാം തവണയാണ് ഉത്തേജക മരുന്ന് പരിശോധനയില്‍ ഒരു ഇന്ത്യന്‍ ക്രിക്കറ്റ് താരം കുടുങ്ങുന്നത്. നേരത്തേ അണ്ടര്‍ 19 താരമായിരുന്ന പ്രദീപ് സാങ്വാനാണ് ഉത്തരത്തില്‍ പിടിക്കപ്പെട്ടത്. 2013ലെ ഐപിഎല്ലില്‍ കൊല്‍ക്കത്ത നൈറ്റ്റൈഡേഴ്സ് ടീമിനായി കളിക്കുന്നതിനിടെ താരം ഉത്തേജകം ഉപയോഗിച്ചുവെന്നാണ് പരിശോധനയില്‍ കണ്ടെത്തിയത്.

ഇത്തവണ ഉത്തേജക പരിശോധനയില്‍ പിടിക്കപ്പെട്ട താരം ദേശീയ താരമാവാമെന്ന് ഉറപ്പിക്കാനാവില്ല. കാരണം ബിസിസിഐയുടെ കീഴിലുള്ള രഞ്ജി ട്രോഫി, ദുലീപ് ട്രോഫി, ഐപിഎല്‍, ഇറാനി ട്രോഫി ഇങ്ങനെയുള്ള ഏതെങ്കിലുമൊരു ചെറിയ ടൂര്‍ണമെന്റില്‍ മാത്രം കളിച്ചിട്ടുള്ള താരമാവാനും സാധ്യതയുണ്ട്.

വാഡയില്‍ നിന്നും തങ്ങള്‍ക്ക് ഔദ്യോഗികമായി റിപ്പോര്‍ട്ടൊന്നും ഇതുവരെ ലഭിച്ചിട്ടില്ലെന്നും അതിനാല്‍ താരത്തിന്റെ പേര് പുറത്തുപറയാന്‍ സാധിക്കില്ലെന്നുമാണ് ബിസിസിഐ പ്രതികരിച്ചത്.