ഗോവ രാജ്യാന്തര ചലച്ചിത്ര മേള ; ജൂറി അധ്യക്ഷസ്ഥാനം രാജിവച്ച് സുജോയ് ഘോഷ്

0
47

ന്യൂഡല്‍ഹി: ഇന്ത്യന്‍ പനോരമ വിഭാഗത്തിലേക്ക് ജൂറി തിരഞ്ഞെടുത്ത രണ്ട് ചിത്രങ്ങള്‍ കേന്ദ്ര വാര്‍ത്താ വിനിമയ- പ്രക്ഷേപണ മന്ത്രാലയം ഒഴിവാക്കിയതിനു പിന്നാലെ ജൂറി അധ്യക്ഷസ്ഥാനം രാജിവച്ച് സംവിധായകന്‍ സുജോയ് ഘോഷ്.

ഇന്ത്യന്‍ എക്‌സ്പ്രസാണ് വാര്‍ത്ത റിപ്പോര്‍ട്ട് ചെയ്തിരിക്കുന്നത്.വിഷയത്തില്‍ പ്രതികരിക്കാന്‍ സുജോയ് തയ്യാറായിട്ടില്ല.സുജോയ് ഘോഷ് അധ്യക്ഷനായ പതിമൂന്നംഗ ജൂറിയാണ് ഇന്ത്യന്‍ പനോരമയിലേക്കുള്ള ചിത്രങ്ങള്‍ തിരഞ്ഞെടുത്തത്.

24 ചിത്രങ്ങളാണ് ജൂറി തിരഞ്ഞെടുത്തിരുന്നത്. നവംബര്‍ ഒമ്പതിനായിരുന്നു ഇന്ത്യന്‍ പനോരമയിലേക്കുള്ള ഫീച്ചര്‍, നോണ്‍ ഫീച്ചര്‍ വിഭാഗത്തിലെ ചിത്രങ്ങളുടെ പട്ടിക വാര്‍ത്താ വിതരണ പ്രക്ഷേപണ മന്ത്രാലയം പ്രഖ്യാപിച്ചത്.

സനല്‍കുമാര്‍ ശശിധരന്റെ എസ് ദുര്‍ഗയും രവി ജാദവ് സംവിധാനം ചെയ്ത ന്യൂഡും ജൂറി അംഗങ്ങള്‍ അറിയാതെ മേളയില്‍ നിന്ന് ഒഴിവാക്കി. കേന്ദ്രവാര്‍ത്താവിതരണ പ്രക്ഷേപണ വകുപ്പ് ഇടപെട്ടാണ് ഈ ചിത്രങ്ങള്‍ ഒഴിവാക്കിയത്.

എസ് ദുര്‍ഗ, ന്യൂഡ് എന്നീ സിനിമകള്‍ പട്ടികയില്‍നിന്ന് ഒഴിവാക്കിയതില്‍ ചില ജൂറി അംഗങ്ങളില്‍ ചിലര്‍ പ്രതിഷേധം അറിയിച്ചിരുന്നു. നവംബര്‍ 20 മുതല്‍ 28 വരെയാണ് ചലച്ചിത്ര മേള നടക്കുന്നത്.