മലപ്പുറം: തെരഞ്ഞെടുപ്പ് സത്യവാങ്മൂലത്തില്‍ സ്വന്തം ഉടമസ്ഥതയിലുള്ള ഭൂമിക്ക് സെന്റിന് 57 രൂപ മാത്രം വിലയിട്ട് പി.വി.അന്‍വര്‍ എംഎല്‍എ. എംഎല്‍എ 2015 വരെ വാങ്ങിയ ഭൂമിക്കാണ് ഈ വില. ന്യായവിലയുടെ അയലത്തുപോലും എത്താത്ത തുക കാണിച്ച് തെരഞ്ഞെടുപ്പ് കമ്മീഷനേയും എംഎല്‍എ വിഡ്ഢിയാക്കിയിരിക്കുകയാണ്.
തെരഞ്ഞെടുപ്പ് സത്യവാങ്മൂലത്തില്‍ നല്‍കിയ ഭൂമിയുടെ വിവരത്തിലൂടെയാണ് അന്‍വറിന്റെ അനധികൃത ഭൂമി സമ്പാദനം വ്യക്തമാകുന്നത്. തൃക്കലങ്ങോട്, പെരകമണ്ണ വില്ലേജുകളിലായി 207.84 ഏക്കര്‍ ഭൂമി വാങ്ങിക്കൂട്ടിയെന്ന് എംഎല്‍എ നല്‍കിയ സത്യവാങ്മൂലത്തില്‍ വ്യക്തമാക്കിയിട്ടുണ്ട്. 11,88,900 രൂപയാണ് 207.84 ഏക്കര്‍ ഭൂമിയുടെ വിലയായി കാണിച്ചിരിക്കുന്നത്. ഒരു ഏക്കര്‍ ഭൂമിക്ക് 5,720 രൂപ മാത്രം, അതായത് ഒരു സെന്റിന് അന്‍പത്തിയേഴ് രൂപ 20 പൈസ മാത്രം.
2015 വരെ വാങ്ങിയ ഭൂമിക്കും ഈ വിലയാണ് കാണിച്ചിരിക്കുന്നത്. സ്ഥലത്തിന് സെന്റിന് നാലായിരം രൂപ ന്യായ വില ഉണ്ടായിരുന്ന കാലയളവിലാണ് ഈ തുച്ഛമായ തുക കാണിച്ച് എംഎല്‍എ കള്ളക്കളി നടത്തിയിരിക്കുന്നത്. ഈ പ്രദേശങ്ങളില്‍ അന്‍പതിനായിരം രൂപ മുതല്‍ ഒരു ലക്ഷം രൂപ വരെ മാര്‍ക്കറ്റ് വില ഉണ്ടായിരുന്ന സമയത്താണ് അന്‍വര്‍ ഇത്രയും കുറഞ്ഞ വില ഭൂമിയ്ക്ക് കാണിച്ചിരിക്കുന്നത്.
അനധികൃത ഭൂമി സമ്പാദനം ഉള്‍പ്പടെ സമീപകാലത്ത് പുറത്ത് വന്ന നിയമലംഘനങ്ങളിലൊന്നും എംഎല്‍എ പ്രതികരിച്ചിട്ടില്ലെന്നതും ശ്രദ്ധേയമാണ്. എന്നാ്ല്‍ അനധികൃത ഭൂമി സമ്പാദനത്തില്‍ പി.വി.അന്‍വറിനെതിരെ റവന്യൂവകുപ്പ് അന്വേഷണം തുടങ്ങിക്കഴിഞ്ഞു.
