സ്ഥാനാര്‍ത്ഥി പട്ടികയില്‍ ഉള്‍പ്പെടുത്തിയില്ല; കെജ്‌രിവാളിനെതിരെ കുമാര്‍ വിശ്വാസ്

0
36

ന്യൂഡല്‍ഹി: രാജ്യസഭാ തിരഞ്ഞെടുപ്പിലേക്കുള്ള സ്ഥാനാര്‍ത്ഥി പട്ടിക ആം ആദ്മി പ്രഖ്യാപിച്ചു. പട്ടികയില്‍ നിന്ന് ആം ആദ്മി സ്ഥാപക നേതാവായ കുമാര്‍ വിശ്വാസിനെ തഴഞ്ഞു. ചാര്‍ട്ടേഡ് അക്കൗണ്ടന്റും മുന്‍ ഇന്ത്യന്‍ ചാര്‍ട്ടേഡ് അക്കൗണ്ടന്റ്സ് ഇന്‍സ്റ്റിറ്റ്യൂട്ട് ഡയറക്ടറുമായ എന്‍.ഡി. ഗുപ്ത, സാമൂഹ്യ പ്രവര്‍ത്തകന്‍ സുശീല്‍ ഗുപ്ത, പാര്‍ട്ടി പ്രവര്‍ത്തകനായ സഞ്ജയ് സിങ് എന്നിവരെയാണ് പാര്‍ട്ടി സ്ഥാനാര്‍ത്ഥികളായി നാമനിര്‍ദ്ദേശം ചെയ്യുക.

മുഖ്യമന്ത്രി അരവിന്ദ് കെജ്‌രിവാളിന്റെ വസതിയില്‍ ചേര്‍ന്ന ആം ആദ്മി പാര്‍ട്ടിയുടെ രാഷ്ട്രീയകാര്യ സമിതി യോഗത്തിലാണ് സ്ഥാനാര്‍ത്ഥികളെ തീരുമാനിച്ചത്. 56 പാര്‍ട്ടി എംഎല്‍എമാര്‍ യോഗത്തില്‍ പങ്കെടുത്തിരുന്നു.

അതേസമയം സ്ഥാനാര്‍ത്ഥി പ്രഖ്യാപനത്തിനെതിരെ പ്രതിഷേധവുമായി കുമാര്‍ വിശ്വാസ് രംഗത്തെത്തി. സത്യങ്ങള്‍ വിളിച്ചു പറഞ്ഞതിനുള്ള ശിക്ഷയാണ് തനിക്ക് ലഭിച്ചതെന്നും തന്റെ രക്തസാക്ഷിത്വം അംഗീകരിക്കുന്നുവെന്നും കുമാര്‍ വിശ്വാസ് മാധ്യമങ്ങളോട് പ്രതികരിച്ചു.

കൂടാതെ മുഖ്യമന്ത്രി അരവിന്ദ് കെജ്‌രിവാളിനെതിരെയും അദ്ദേഹം ശക്തമായി ആഞ്ഞടിച്ചു. ‘ഒരു വര്‍ഷം മുമ്പ് ഒരു യോഗത്തിനിടെ കെജ്‌രിവാള്‍ എന്നെ നോക്കി ചിരിച്ചുകൊണ്ടു പറഞ്ഞു, ഞങ്ങള്‍ നിങ്ങളെ രാഷ്ട്രീയമായി നേരിടും പക്ഷെ നിങ്ങള്‍ക്ക് രക്തസാക്ഷി പരിവേഷം അനുവദിക്കില്ല എന്ന്. എന്റെ ഒരേയൊരു അപേക്ഷ എന്റെ രക്തസാക്ഷിത്വം അംഗീകരിക്കുക എന്നതാണ്. രക്തസാക്ഷികള്‍ക്ക് ഒരേ ഒരു നിയമമാണുള്ളത്, അത് ശരീരത്തെ വെറുതെ വിടുക എന്നുള്ളതാണ്.’ കുമാര്‍ വിശ്വാസ് പറഞ്ഞു.

നേരത്തെ രാജ്യസഭാ തിരഞ്ഞെടുപ്പിലേക്കുള്ള സ്ഥാനാര്‍ത്ഥി പട്ടികയില്‍ കുമാര്‍ വിശ്വാസിനെ സ്ഥാനാര്‍ഥിയാക്കുമെന്നുള്ള അഭ്യൂഹങ്ങളുണ്ടായിരുന്നു. രാജ്യസഭയിലേക്ക് മത്സരിക്കാനുള്ള താല്‍പര്യം അദ്ദേഹം പ്രകടിപ്പിക്കുകയും ചെയ്തിരുന്നു. ആം ആദ്മി പാര്‍ട്ടിയുടെ രാഷ്ട്രീയകാര്യ സമിതി അംഗം കൂടിയാണ് കുമാര്‍ വിശ്വാസ്.