സ്‌കൂള്‍ അധ്യാപികമാര്‍ സാരിക്ക് മുകളില്‍ കോട്ട് ധരിക്കണമെന്ന് നിര്‍ബന്ധിക്കാന്‍ പാടില്ല: കേരള വനിത കമ്മീഷന്‍

0
119

സ്‌കൂള്‍ അധ്യാപികമാര്‍ സാരിക്ക് മുകളില്‍ കോട്ട് ധരിക്കണമെന്ന് ഹെഡ്മാസ്റ്റര്‍മാരോ മാനേജര്‍മാരോ നിര്‍ബന്ധിക്കാന്‍ പാടില്ലെന്ന് കേരള വനിത കമ്മീഷന്‍. പത്തനംതിട്ട മല്ലപ്പള്ളിയിലെ ആനിക്കാട് സന്റെ് മേരീസ് ഹൈസ്‌കൂള്‍ അധ്യാപിക ബീന നല്‍കിയ പരാതിയിലാണ് ഈ നിര്‍ദേശം. മാനേജറുടെ നിര്‍ദേശം പാലിക്കാനാകാത്ത അധ്യാപികക്കെതിരെ സ്‌കൂള്‍ അധികൃതര്‍ നടപടികളിലേക്ക് കടന്ന സാഹചര്യത്തിലാണ് വനിത കമ്മീഷന് പരാതി നല്‍കിയത്.

പൊതുവിദ്യാഭ്യാസ ഡയറക്ടര്‍ അധ്യാപികമാരുടെ വേഷത്തിന്റെ കാര്യത്തില്‍ പുറപ്പെടുവിച്ച സര്‍ക്കുലറിന് വിരുദ്ധമായ നിര്‍ദേശങ്ങള്‍ നല്‍കാന്‍ സ്ഥാപന അധികൃതര്‍ക്ക് അധികാരമില്ലെന്ന് കമീഷന്‍ അംഗം ഷാഹിദ കമാല്‍ ഉത്തരവിട്ടു.

ഇതുസംബന്ധിച്ച് ആനിക്കാട് ഗ്രാമപഞ്ചായത്ത് വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍മാനും കമീഷനോട് നടപടി ആവശ്യപ്പെട്ടിരുന്നു. പുരുഷ അധ്യാപകര്‍ക്കോ ഓഫിസ് ജീവനക്കാര്‍ക്കോ ഓവര്‍കോട്ട് ഏര്‍പ്പെടുത്തിയിരുന്നില്ലെന്ന് പരാതിയില്‍ പറഞ്ഞു. കമീഷനംഗം സ്‌കൂളില്‍ നേരിട്ടെത്തി തെളിവെടുപ്പ് നടത്തിയശേഷമാണ് ഉത്തരവ് പുറപ്പെടുവിച്ചത്.