ഇറാനില്‍ നിന്നുള്ള എണ്ണ ഇറക്കുമതി ഇന്ത്യ അവസാനിപ്പിക്കണമെന്ന് അമേരിക്ക

0
51

വാഷിങ്ടണ്‍: ഇന്ത്യ ഉള്‍പെടെ എല്ലാ രാജ്യങ്ങളും ഇറാനില്‍ നിന്ന് നവംബറോടെ എണ്ണ ഇറക്കുമതി അവസാനിപ്പിക്കണമെന്ന് അമേരിക്ക. ഇന്ത്യയ്‌ക്കോ ഇന്ത്യന്‍ കമ്പനികള്‍ക്കോ ഇക്കാര്യത്തില്‍ ഇളവ് അനുവദിക്കാനാകില്ലെന്നും അമേരിക്ക വ്യക്തമാക്കി.

ഇറാനെതിരായ ഉപരോധം തുടരാനുള്ള തീരുമാനത്തിനൊപ്പമാണ് അമേരിക്ക നിലപാട് കടുപ്പിച്ചിരിക്കുന്നത്. ഇന്ത്യയ്ക്കും ചൈനയ്ക്കും ഇത് ബാധകമാണെന്ന് അമേരിക്കന്‍ സ്‌റ്റേറ്റ് ഡിപ്പാര്‍ട്ട്‌മെന്റ് വൃത്തങ്ങള്‍ അറിയിച്ചു.

ഇറാനെതിരായ ഉപരോധം ഇന്ത്യയ്ക്കും ചൈനയ്ക്കും ബാധകമാണെന്നും എണ്ണ ഇറക്കുമതി നടത്തുന്ന രാജ്യങ്ങള്‍ ഇപ്പോള്‍ മുതല്‍ അത് കുറച്ചുകൊണ്ട് വരികയും നവംബര്‍ നാലോട് കൂടി പൂര്‍ണമായും അത് നിര്‍ത്തണമെന്നുമാണ് അമേരിക്കയുടെ ആവശ്യം.

ഇറാനെ ഒറ്റപ്പെടുത്തുകയും അവരുടെ വരുമാന മാര്‍ഗം കണ്ടെത്തി അത് അടയ്ക്കുകയും ചെയ്യുകയാണ് അമേരിക്ക ലക്ഷ്യമിടുന്നത്. അടുത്ത ആഴ്ച നടക്കാനിരിക്കുന്ന ഇന്ത്യ-അമേരിക്ക ചര്‍ച്ചയില്‍ പ്രധാന വിഷയമായി അമേരിക്ക ഇത് ഉന്നയിക്കും. വിദേശകാര്യ മന്ത്രി സുഷമ സ്വരാജ്, പ്രതിരോധമന്ത്രി നിര്‍മല സീതാരാമന്‍ എന്നിവരാണ് ഇന്ത്യയെ പ്രതിനിധീകരിച്ച് ചര്‍ച്ചയില്‍ പങ്കെടുക്കുന്നത്.